Robert Gauvin
Auteur
Robert GAUVIN, kél koté ou-i sort ?
Mi sort Bois-de Nèfles Saint-Denis.Moin té viv rant le bitasion kann- zanana-mang mon papa épi lékol ousak mon manman té i travay. Ek mon manman moin la gingn le gou fé lékol, ék mon papa le gou kozé, le gou rakont zistoir, le gou kass ti-boi.
Kél lékol ou la parti ?
Moin la parti lékol Bois-de-Nèfles ; moin té marsh pat-a-tér, moin té joué zassièt, moin té koz rienk kréol ék mon bann kamarad.Aprésa moin la- parti lékol-lycée ; kan moin la gingn mon 2e Bac moin la-désot la mér ; moin la pass lagrégassion lalman.
Kan ou té fini ou la rant la Rényon ?
Bin oui, moin la artourné, moin la marié ; moin la gingn 3 garson.Moin la fé proféssër Lalman mé a koté dsa, moin té prézidan paran d’élèv pou tash moiyen fé avanss in pë lékol.Epi moin té prézidan konsèy la kültür ( CCEE ) depi 1984 jiska 1993.
Astër ou-i vienn sort in liv an kréol i apél « La Rényon dann kër »
Moin la toujour batay po la lang kréol ; moin la travay ék bann journaliss la fé in journal kréol sü RFO té i apèl « Komsaminm ». Sa la donn amoin lidé fé sort mon liv; mé avan-sa moin té fine, èk mon frèr Axel, mét an kréol « le Cantique des cantiques » épi osi « Les chansons madécasses « de Parny.
Ou lé parti pou ékrir an kréol astër ?
Sa-minm koméla mon plü gran kontantman é an minm tan mon plü gran regré : mi demann amoin akoz moin la atann tou-s’tan-la pou ékri an kréol.
Kisa,
Tan pti,
La pa rèv pran lélan,
Fonsé, lofé, tay la briz,
Plï vit, plï vit ankor,
Ziskatank le pié i shap èk la tér,
Ziskatank, zél karté,
lï vienbou dékolé,
Lï vienbou mont anlér
Parèy payankë dann sièl ?
Moin-si, l’ot jour, dan lé-o Saint-Leu, moin la rèv fé konm zoizo : moin té woi amoin déjà, parapant amaré dann do, mon kask sï mon tèt, apo fil dan la désant, apo rouv la zèl, apo volé…Tout té doss…soman toudinkou, jïs devan moin, in fon n’ranpar, in ravine a malër, in sapér guél rouvér po atann mon kor ! Moin la férm le zië pou pa woir la mor…
